جدایی

۱- دما تو زِنئی رنج و عَذاوَه
سِتونش إشکِسّه وِ رییِ آوّه

۲_خووّه که بعدِ تو یِه رو نَمونِم
تشِ دیری تونّه سُختَه سِخونِم

۳- چَشِ دُنیای مِه پُر دِ غُوارَه
رنگِ روزم مِنی رنگِ دُوارَه

۴_ وِری ای فاطمه امیدِ جونم
که بارونی بییَه چَشیا بَچونِم

۵ - وِری که إی بچونت بیقرارَن
وِ دامو عَسرِ غم شُر شُر می وارَن

۶_دلم سی تو مِنی اَنبارِ دردَه
حونِه حالی دِ تو یخچالِ سَردَ

۷- تونی نورِ چراغِ زندِگونیم
تونی شادیِ دورونِ جِوونیم

۸-دلم دِ داغِ تو داغی تَنیره
وِ زندونِ جدایی چی اَسیرَه

۹- زِمی پس بیر إی دُرٌِ گِرونم
سَنگینَه إی غمِ دیری وِ شونم

۱۰-بیَه مهمونِ تو دُرٌِ پیَمبر
بغل وا کُو تو سی زهرای اَطهر

۱۱-چَنی خو بی نِیوما إی جُدایی
نِیومایِه وِ سَر إی آشِنایی

استاد علیرضا حکیم